بعض من الجنة

الجنة

الجنة أرضاً طيبة يدخلوها الطيبين

خلقَ الرحمن لي عِبادُو المُتقين

خياما من اللُؤلؤ والمسِك بدل الطين

فيها الخيرات الحِسان والحور العِين

...............

فيها العين سلسبيل والشراب زنجبيل

تلقى فيها أدم أبوك وأخوانك والخليل

الملايكة الكرام السفرة والروح جبريل

الرسول وأهله وأصحابُو النصروهُ قِبيل

...............

في الجنة القُصور والنعيم والخير

الفضة والحرير الشراب الطهور

الذهب والياقوت المسك والكافور

 .............

في الجنة لا شمس لا زمهرير

الأنهار بتجري والسوق الكبير

الفاكهة اللذيذة ولحوم الطير

...........

فيها الما شافتو عين ولا حِلم بيه بَشَر في حياتُو

آخر النعيم كشف الحجاب وشوفة العليم زاتُو 

الرضى والخلود في النعيم نِعمة من رحماتُو

أسأل الله لي ولكم رضاه فليس بعد رضاه إلا الجنة

أرضىَ بي المقسوم

أرضىَ بالمقسوم

أخوي مالَك ديما زهجان ..كأنك ما راضي بي الفِيها

رزقك في الدنيا مقسوم  ..        قَبُل ما إنت تطلع  ليها

أسعى وإتوكل علي الرزاق .. والبِتجي مِنهُ ماليك دخل فيها

      .....................

كان حمدتَ ورِضيت في القليل يتبارك ليك

تتمتع بي يسيرها والصحة تُوهب ليك

أهلك مايشوفو طبيب والعافية تُوهب ليك

       .....................

أرضى بي المقسوم واذكر القهار

وكان كِترت عليك الهموم استغفر الغفار

يفرج ليك الهموم .. ده كلام حببيك المختار 

........

كان رفعت يديك ودعيت .. ماتقول ما استجاب ليك

يمكن حبَّ صوتك  .. وداير  تاني  يسمع  ليك

ماتقول بظلمك ! هو حرمهُ علي نفسه قَبُل ما يحرِمهُ عليك

.............

ربك كريم  ورحيم .. بس  إنت  ناجيهُ

ما داير منك شي غير ترفع إيديك ليهُ

قول أدعو واتوسل ... خلي عينيك تفيض ليهُ

.............

كل دمعة منك تمسح العبرات

تقضي للحاجات وتيسر الكُرُبات

تجدد إيمانك وتقلل العثرات

يا  صاحب النعاج والبعير دايرة أسألك هل عندك ضمير؟

كيفن بتقلع  ثمرة  فؤادك  وبي  إيدك  ترميها  في البير

عملت شنو المسكينة؟؟! في شوية نعاج !! أريتا تطير

ضاعت الوديعة وضيعت  الأمانة   والعملتو  خطير

مافي عاقل بقتل جناهُ مهما كان الأهملو شوية ولى كتير

والحي ما بموت والعُمُر محسوب وربك لطيف وخبير

تِبعتَ الملعون يوم غضبت عليها ورميتا جوه  البير

لكن ربك  بي  حنانهُ  إتولاها  وبقى  ليها  نصير

قلبك بقى أقسى من الشوك ... القايم  جوه  البير

والكريم من رزقه ما نساها يوم نسيتا ورميتا في البير

رسل ليها اللبن بدل  حنان أمها ال نهلت منّو  كتير

وعاشت ايام في البير عشان باقي ليها شي في العِمير

أصلو العُمُر أنفاس وأرزاق كان رميتا في النار او في بير

قِبيل أكان نعلت المنعول ورجعت لي ربك ما كان اخير!!

أشُكرهُ علي الموجود واحمدهُ علي المفقود يخلف ليك اخير

ويا بنية  سامحي  أبوك عشان ينصلح حالهُ  ويبقى  أخير

وما تنسيهُ من بِرك عشان ربك ما نساك هناك في البير

عيدية خروف

خروف الضحية

كل الناس فرحانة ... بُكره عيد الضحية

النسوان جهزن الدكوة  والشطة  بالكمية

والأطفال حارسين الخروف صباح وعشية

ما صدقوا الصبح أذن قاموا سريع باكرية

صبّحوا الخروف أدوهُ العلوق وسقوهُ موية

وبعدالصلاة رجعوا فرحانين مية المية

الأبو سنّ السكين والام جهزت أكبر صينية

ضبحوا الخروف  وقطعوهُ  في الصينية 

الكوم ده للجيران وده للمساكين وده هدية

والباقي  ده  ظبتو لينا منّو صحن  شية

ريحة الشية فاحت في البيوت بدل الطعمية

الابوغسّل إيديهُ ونادى ياولد أرح جيب الشية

ماتنسى خلطة الدكوة بالشطة والمرارة النية

النسوان واحدة تجهز في في المرارة والشية

وواحدة بعيدة مشغولة بتنضف في الكمونية

واحدين ناس شربوت وواحدين دايرين بوقنية

وناس سفن  وببسي  خايفين  من  اللحمة النية

وانا لا مع ناس الشربوت  ولا الببسي ولا البوقنية

عشان لا  باكل  خشم  الكرشة  ولا المرارة النية

لكن  نصيبي  من  المرارة  بنجضو  واديهُ  قلية

ومشروبي الفرات وماني بالحيل على المياه الغازية

وعيد سعيد وربنا  يتوب  على ناس  المرارة النية

والعيد الجاي  نكون في  منى  لا مرارة ولا شية  

رسالة

يا سعادة أسعي ليهم  ......

في طريقم ألحقيهم .....

فوق رؤوسم ظلليهم .....

بي بهاءك توجيهم ....

أبقي ديما ملازمة ليهم ....

تحية للبنية

أحيي  البِنية :_  ... 

الصامّة الخِشيم   ........... السادلة الهِديم .... 

هادي مشيها       ......... طايعه  وليها ......

مريحة امها  ................. مقدره  عمها ...

بارّة أبوها  .................. عازّه  أخوها ....

صاينه  عِرِضها ......... حافظه فرضها ....

ساتره حالها  ........... محترمه خالها ......

لا عالي صوتها ........ لا ناسية موتها ....