أيام زمان

حِليل  أيام  زمان  .. حِليل أهلنا  وحِليل الكان

جية العم والخال بي محنّة حِليل اللمة في الديوان

زمن الجار أمين علي جارُه حليل الكان بيقهر النسوان

النفّاج  أكان  بيناتم   دليل ناساً  كانوا  حُنان

الأطفال يلعبوا الترتار في الشارع بكل أمان

نط الحبل . لعب الصج بالموجود الطفل فرحان

ريحة الخدار في النار تفوح تلقاها في أي مكان

الكِسرة بالقدح الكبير .. الكُوَر عليهن هلال رمضان

أكل طازج حلو وناعم قلب حاضر مافي زول سرحان

مطبوخ بي نفس طيبة حيوية ونشاط مافي زول كسلان

القَلاية  والفُندُك  جبنة الطين  الشراب  بالفنجان

فَك الريق لي كُبارنا قاموا دُغُش يبارك ليهم الرحمن

العِصير راجعين عرق نازل يطهر الأجسام يمسح الأدران

كُبارنا الخير والبركة . الأصالة والتاريخ للكرم عنوان



قُعاد الشارع

يا اخوانا  ما تخلوا  قُعاد الشارع ولِقيط الشمارات

عملتوها ظاهرة بقيتو تقعدوا عشان تطلقوا النظرات

لا بتخلوا الماشة براها .. ولا المعاها الوليدات

المحننة حفظتوها....   وام كرعيناً مشققات

الماشة الدكان.. والدكتور . الرايحات والجايات

لا سِلمن من لسانكم ...   ولا قعدتو بالجنبات

إما أدوا  الشارع حقوقو الفي السُنّة معروفات

كف الاذى وغض البصر ورد التحيات

ولّى كمان أمشو مكان الترويح  والنزهات

ما تقعدوا طول اليوم لا مسؤلية  لا شغلات

الله بسألكم من شبابكم   ومن عمركم الفات

قضيتوهُ كيف ؟ ونسة  وضحك  وشمارات

ولّى شغل ومساعدة ومحافظة على الصلوات

الدنيا ضُل شجرة لابد ينتهي ويجي هادم اللذات

بدل الشمار.   تاكل نار .. وتندم على الغفلات

فوقك سموم .. تحتك جحيم  ناراً ليها لِسنات

ولّى أخير ليك ضُلاً ضليل وقبراً منور بالصالحات

تحجز مقعدك في الجنة تجيك عطورها فايحات

تلقى هناك حور ونعيم وقصور بالحيل عاليات