أهلاً وسهلاً


أشرق النور وبانا مرحبا بمن أتانا أيها الزائر أهلاً لك في القلب مكانا






هذه مدونة إسلامية لا تحتوي على أي شيء يخالف الشرع أو ينافي الآداب فإن رأيتم



غير ذلك فاعلموا اني بريئة منه وليحمل وزره من فعله.. والله شهيد على ما اقول.



وصية : لا تنسونا من صالح دعائكم بظهر الغيب..







الأربعاء، 28 سبتمبر 2011

وصية بالعامية السودانية

أخوي أسمع كلام نبيك وارجع لي إلهك السواك
خلقك قبل المضغه والعلقه من نطفه وباللحم الفوق العظام كساك
أداك الحواس وقفك علي رجليك وفي أحسن صوره سواك
ميزك بالعقل تتأمل بيه وتفكر تنسى وتتذكر دي كلها ماكافياك
خلق ليك السما والأرض سخر ليك الفيها والأفلاك
تعصاه تبعد منه وكان جيتو تايب بي مغفرته يتلقاك
كان سألته يديك ويرضى عليك وبي رحمته يتولاك
وكان خليته يغضب لكن من رزقك ما بنساك
بي ذكرك ليه تكون شاكر بس محل نهاك ما يلقاك


لسانك ما يزل بي كلمه ترضي بيها اللعين وتبقى من الهالكين
حاسب لي كلامك استحي من العلي جنبيك قاعدين
يسجلو ليك كل صغير وكبير يمرق بين الشفتين
عينيك ما تمتعا في الحرام وتقول بتوب بعدين
ملك الموت وراك ما معروف يصلك بعد كم سنه ول ساعتين
أحمد الله وكت تصحا عشان انت لسه مع الحيين
إتوضا تمام وابدا بي الرغيبه هن كلهن ركعتين
صلي الفجر في وقته أصلو قرآنه بحضروه المسبحين
إستنا شويه في مصلاتك استغفر وسبح أبقى من الذاكرين
اقرا الآيه العظيمه في القرآن تحفظك من اللعين
كان عطست أحمد وكان أكلت أشكر الرزاق المتين
خليك دوام مع ربك أوعك تكون من الغافلين
عن صلاتك ما تبقى ساهي لأنها أول شي يسألوك منه يوم الدين
لي رزق الحلال اسعى واتوكل ماتبقى من المتواكلين
الطيب والخبيث مابتساوى حتى لوكان أهل الضلال عليه غالبين
صلي علي الرسول صباح ومسا تكون معاه من الجالسين
أسال ليه الوسيله بعد كل آذان تنال شفاعته يوم الدين
بي والديك إتلطف وادعو ليهم بالرحمه تكون من البارين
جارك أحسن ليه وما تتكبر عليه خليكم دوام متوادين
لي رحمك دوام واصل عشان ماتبقى من الملعونين
كون في عون أخوك ما إنت ليه مرايا ابقى ليه من الناصحين
البتتمناه لي نفسك ادعي ليه بي غيبتو الملك يقول آمين ليكم الإتنين
وكان حياك بي{ كيفك}رد ليه بالأحسن لأنها فرض علي المسلمين
رد الأمانه وانصر المظلوم واحذر دعوة المظلومين
اغفر واصبر وسامح يكرمك الما بضيع أجر المحسنين
من مالك اتصدق يتبارك ليك بي دعوة الملكين
طعامك مايبقى دابك ربنا وصاك علي الجار والمسكين
حافظ علي صيامك ما تضيعو بالنميمه والكلام الشين
وان الله وسع عليك أدي فرضك واسعى بين الجبلين
وماتبقى جافي زور نبيك صلي في الروضه وسلم علي الصاحبين
ترجع نضيف وخفيف واعقد النيه عشان للرجعه تكون مع الناويين
وماتخلي دين بي قفاك تلقى نفسك في القبر مع المسجونين
عشان لمن يحين الاجل تجي الملايكه تتوفاك مع الطيبين
روحك تعرج طيبه لي باريها تلقى كتابك هناك مع الابرار في عليين
برزخك يكون نعيم في نعيم لحدك مضوي بي تبارك ويـــــــــس
ويوم الحق تقوم فرحان وتتظلل مع الفي الله كنتو متحابين
تلقى الخلق كلها لي أرض الحساب ماشين
البٍِِِحَبو ووالبنْجرو والبي سرعة البرق منسرعين
الخلايق كلها مجتمعه إنس وجان وحيوانات حتى الطير محشورين
منتظره ساعة القصاص والحساب الراجين رحمته واليائسين
تتفتح السموات وتنزل الملايكه وواحدين لي جهنم جارريــــــــن
ليها شهيق وليها زفير بتتغيظ دايره تنتقم صابره ليها سنين
شرارتا قدر القصر طايره كايسه لي أهل قعرا المنافقين



النبيين واقفين من آدم نوح وابراهيم لي محمد خاتم المرسلين
العباد تمش من نبي لي التاني دايره الشفاعه من العرق الملجم الفكين
وبعد زمنا طويل وصعيب ينزل الحق وينزل الميزان العديل ومتين



الناس قلوبا طايره وعيونا شاخصه
لا واقفين ولا قاعدين متل الفراش مبثوثين
الخلق تمش لي أبوها دايراه يشفع ليها
من حر الشمس القريب من العين
يقول ليهم امشو لي نوح اصلو صبر علي قومه الف سنه إلا خمسين
نوح يقول ليهم أمشو للخليل وعيسى يقول ليهم أولى بيها آخر النبيين
ما أصلو كل رسول عجل دعوته
إلا حبيبنا محمد إدخرا لينا لي يوم الدين
الحبيب يمش ويسجد وربه يلهمو كلاما ما عرفو أحد من العالمين
يقول ليه إشفع تشفع واسأل بنديك
همه أمته ربنا يجزيه عنا خير ما يجزي النبيين
يشفع ليك معاهم وتدخل الفردوس بي رحمة رب العالمين
الناس بالحساب والعذاب منشغلين
وانت تتقلب في نعيم الجنة مع الحور العين

دموع الحزن

الحمد لله على  كل حال

(إنا لله وإنا إليه راجعون)

إن العين لتدمع وإن القلب ليحزن ولا نقول إلا ما يرضي الله وإنا لفراقك يا أبتي لمحزونون ..

كأنكم اخترتم زمان رحيلكم... بعيد صلاة الليل والصوم والذكر

غسلتم بصافي الدمع صافي قلوبكم.يشعشع فيها النور كالكوكب الدر
               
وداعا حبيبي  لالتقاء إلى الحشر . وإن كان في قلبي عليك مثل لظى الجمر
                  

صبرت لأني لم أجد لي مخلصا...إليك وما من حيلة لي سوى الصبر


{{{جمعنا الله بك في مستقر رحمته}}}





رحمك الله أباً حنوناً رحمك الله معلماً ومُربياً رحمك الله شيخاً وإماماً ..

لقد افتقدك كل شيء المدارس المساجد المنابر الشوارع الآباء الامهات الأطفال الشباب كل من رآك احبك وكل من سمع بك تعلق بك

لقد تركت فراغً شاسعاً وألماً عميقاً

رحلت في وقتٍ أحوج مانكون فيه إليك

لوكان البكاء جائزاً ما توقفت عنه لوكان الحِداد ليس منهيٌ عنه ما تركته

ما زالت وصاياك في أذناي دائماً اسمع صالح دعواتك لي ولبناتي

مازلت أذكر سؤالك وعتابك لي إن غبت عنك يوما واحداً (وين إنتي الليلة ما جيتيني !!!!!!؟

طرقاتك المميزة على بابي أذكرها ..

أذكر حُبك وحنانك ووصاياك المتواصلة

ماذا أقول وماذا اكتب تعجز الكلمات وتتبعثر الحروف والعبرة تشتت افكاري

عزاءنا الذي يصبرنا على فراقك

ان أجاب الله دعاءك وبلغك امنيتك أن تموت بالمدينة وتقبر بها وفي رمضان

نحسبك شهيداً بإذن الله لكونك مِت مبطوناً ودُفنت بعيداُ عن أرضك ويكفيك فخراً بأرض المدينة الطاهرة المطهرة على ساكنها أفضل الصلاة والسلام

لك من الدعاء أخلصه
رحمك الله وغفر لك وأسكنك الفردوس الاعلى مع النبيين والصديقين والصالحين وحَسُن أولئك رفيقاً