أهلاً وسهلاً


أشرق النور وبانا مرحبا بمن أتانا أيها الزائر أهلاً لك في القلب مكانا






هذه مدونة إسلامية لا تحتوي على أي شيء يخالف الشرع أو ينافي الآداب فإن رأيتم



غير ذلك فاعلموا اني بريئة منه وليحمل وزره من فعله.. والله شهيد على ما اقول.



وصية : لا تنسونا من صالح دعائكم بظهر الغيب..







الجمعة، 3 يونيو 2011

حق الأم قرض

                        هذه كلمت لشاعر سوداني باللهجة العامية السودانية يحكي فيها قصة ولد عاق لأمه عافانا الله وإياكم
                   
                      وأعاننا على برهم


        أبوك لبى نداء الأجل خلاك في الأرحام جنين

                            عند المخاض ساعة مجيك طار المنام من أي عين
يوم قالوا لي امك ولد وفي الفرحة غرقوا الحاضرين
سرحت مع الأحلام قالت عشاي يكبر متين
أشوف جديدوا أضوق حلوهو الناس يقولوا عديل وزين
يزرع حياتي هنا وسرور يملاها بالمال والبنين
إتحزمت وإتلزمت سالت إله الكون يعين
صدت جميع المغريات رفضت إعانة كل معين
صبرت علي ظلم الحسن وجازيتها بي ظلم الحسين


حليلك يالضميرك مات دست قيمنا واتوطيت
تابعت نفسك الامارة حدك فُتو واتعديت

قول لي ياخي لو بالجد وعقلك فيك وما جنيت
تسمع كيف كلام مرتك وترضى امك تفوت البيت


زهدت في نعيم الدنيا عشان فاخر التياب تكسيك
ورفضت بي ادب خطابها عشان ما يبقوا ليك شريك
حلمك قبل يصبح منية ختته ليك بين إيديك
بالهنا والنعيم العِشته حلموا اترابك الحوليك

 حِليلك ياالضميرك مات دست قيمنا  واتوطيت

صبحت جنتها واحلامها غيرك مافي ليها طريق
راس الشوك لو مساك يشعل في قليبها حريق
تطويها الهموم والوحدة لمن إنت تصحى تفيق
ولو فد يوم حِردت غداك يومين ما بتفك الريق
ربت بالحلال والله شاهدين العزول وصديق
ناس الحلة والعرفوها والجيران في أي فريق
ماذكروها غير حمدوها بالمصلاية والإبريق


لكن وااا ضياع ترباتها حقها ذرة ما أوفيت
حليلها وااا خسار بلالها يبقالك سعيد وبخيت
كايس للسعادة دروبها دابك بي جدارة شقيت
فرشك تاني يبقى جحيم وما بتقدر عليه تبيت

غِرقت في الهموم والآهة إيدك ليها ما مديت
مرضت ماسعيت في علاجها لا هماك لا اهتميت
مهما تصلي ولّى تزكي كان عمرت كان حجيت
رب العزة كيفن يرضى امك ليها ما أرضيت


كيف انتم ليك مراد وضاع راس العشم والخيط
ولِسع في الغلط متمادي السويتو قايلو بسيط
عين الناس محل ما تمشي استنكارها بيك يحيط
وين راح تلقى زي الام قلب وافي وحنان ووهيط
مافي شبيها غير نخلتنا لما تشيل تسوي سبيط
جازت بالرطب راميها ما قالتلو إنت قسيت
قاومت أي ريح جاييها عشان الطير عليها يبيت
يا شارب كؤؤس الغفلة كان صحاك غناي ووعيت
حصِل والدتك رضيها طوق جيدها بالسوميت
ولى احسن جناك الوالدو فيك يسوي ما سويت
حق الام قرض صدقني ضاقتو في جليدها كِريت