أهلاً وسهلاً


أشرق النور وبانا مرحبا بمن أتانا أيها الزائر أهلاً لك في القلب مكانا






هذه مدونة إسلامية لا تحتوي على أي شيء يخالف الشرع أو ينافي الآداب فإن رأيتم



غير ذلك فاعلموا اني بريئة منه وليحمل وزره من فعله.. والله شهيد على ما اقول.



وصية : لا تنسونا من صالح دعائكم بظهر الغيب..







الأحد، 27 يناير 2013

الكلام ليك





يابت الحلال إتحشمي....... وخليك تقيلة
من لونك ما تنسلخي إنتِ سودانية أصيلة
الكريمات خطيرة ... قنبلة موقوتة عديلة
إن كان لابد في خلطات الاعشاب هي البديلة
شاوري الاخصائي... ما تبقي للجمال قتيلة


        ...........................



بشوفِك خليتي حِشمتنا .. ال  للأصالة اساس
لبستي حِتة طرحة .. هامش ورقة من كراس
مِطلِعة العينة والكمية وجزء من الصدر للناس
لِبسك كله محذق اصلو كل زول حاياخد مقاس!!
الديانا مع ابو نجمة تعمل الحساسية ووجع الراس
شايفاك ليك زمن بتنظلتي ... لِسة ما ادوك الكاس!!!


      ....................................


المشية طق واللُبانة طرق.. ويـــــن الخجل يا بنية؟؟
العيون يمين  وشمال ...... في لحظة  تلقط  مية!!!
والنغمة كمان من نانسي !!!!!   ولّى هبالة اجنبية
والمصيبة تكوني ما فارزة شي وفي الE كمان امية
أصلو العلم بزيد صاحبو هيبة ويخلي البِت حورية

          ..........................


إنتِ ما شُفتِ اختك السادلة الهديم وصامّا خِشيمها!!
البتمشي بي جنبة في الشارع   وضحكتها  بِسيمه
طايعة وليها هادي مشيها .....  في طبِعها كريمه
الصغير والكبير مالي عينها كلهم عندهم ليها قيمه
لابودرة لامكياج   ولا كارينا .....   محشمة دِيما
خجلها طبيعي وحافظة لسانها من الشمار والنميمة


                ......................


ولّى ما شُفتي اخوها شيّال التقيلة البِكِرم الضيف؟؟
رجولة وشهامة كرم ومرووة ....صيف وخريف
إن جاهُ زاير يتلقاه متباشر ..علي حيلو ليهو يقيف
يرحب بيو حباب عمي ... مُش ياحاج ويا ظريف!!
أصلو قُعادو في الديوان .. عشم امه ...تُمامة الكيف
يمين أبوه...  ركازة اهلو جُملة .... ضو   الكفيف


         ..............................


ولّى عاجبك المدلع .... البشوف وشُو أكتر منك
مِشاركك في كان واخواتها .... وشّو   زي    وشّك!!
يقوم يضحك عليك ...... يوم القلم  يضيع منك!!!!!!!
ما الحواجب إنتِ شِلتيها ... ودايرة تبقي أصغر من سِنك
دحين رفيقك ده كان صبت فيك مطرة !!! ما بِجر منك
أصلو عايش في خيال وكان وقعتي ما ظنيتو زاتو يسندك


       ...................................


عشان كِده خلي وشِك طبيعي .... وانستري من الرجال
وخلي العطور والمكياج ...... لامن تدخلي بيت الحلال
واحصريها علي زوجك..... وما توريها لي كل الرجال
وللقسمة ما تستعجلي ........ كان الزمن قِصِر ولى طال
ومن قلبي بتمنى ليك السعادة...........  وحسن الفال
ورفيقك إن شاالله ربك يتوب عليهو..ويصلح  ليه الحال
وربنا يهدي البنات ... ويسعدِن .. ويحقق ليهن المنال

بالعامية السودانية



البنية الشابة


البنية الشابة عاجباها نفِسها لابسة المحذق وتحوم ناسية الموت
غاشيها اللعين ... قال ليها إتمتعي بي شبابك... قبل ما يفوت
ماهو ما لاعب بيها براها  .....  ده حاله  مع  أغلب البنوت
جات راجعة  من صاحباتها مِسا مسرورة تكسر في الصوت

                        ...................

رقدت  في  السرير ...... شعرت بي جِسمها  إتقل  واتنمل
حست بالعطش الشديد .... كاست لي ريقها  ..لِقتو كِمل!!!!
نادت.... ونادت...... لِقت إنها  خلاص .. ماقادرة  تتحمل
لا أبوها سِمعها لا أمها ... إلا اللعين....  جاها يتململ....

                 ..........................

قالت ليه إنت منو ؟؟ قال ليها أنا قرينك ... انا الشيطان
قالت ليه أعوذ بالله منك !!!! انا ما تبعك !!!أنا إنسان!!!
قال ليها أعوذ بالله !!؟؟ خلاص ! يادوب قلبك رجع ولان؟

                 ......................

قالت ليه تقصد شنو؟؟ انا في كابوس ... وأكيد بصحى مِنّو
ضِحك عليها .. وقال ليها كابوس شنو!! ده المافي مفر مِنّو
قالت ليه أهلي بقولوا انا صغيرة ..... وهُن الموت عارفنو

               ............................


قال ليها أنا الكنت بمَليهُم ... عشان أنا  ... المسلّط عليك
الموت ما بعرف صغير وكبير وما بتعداك لو كان جاييك
خلاص بعد كده نتفارق.....   واكون أنهيت مهمتي فيك

            .............................


قالت ليه ....... كمان كانت عندك معاي  مهمة ياكذاب!!
قال ليها ...أنا عدوك مما طلعوني من الجنة وابوك تاب
حالف ما أخلي لي بشر  .......   إلا أدخلو نار العذاب


            ............................


قالت ليه انا ما كافرة ... ما بتقدر علي...  امش شوف غيري
قال ليها أنا كنت بزين ليك الذنوب...  خليتك تشوفي بي عيني
عجزتِك من التوبة ولمن تسألي الجنة بتمنى ليك النار في سِري


          ...............................

قالت ليه يا حاسد!!! أتحداك أنا مسلمة وما عندي ذنوب كتيرة
قال ليها أجلتي الصلاة .. أخرتيها لامن خليتيها واللِستة كبيييرة
قالت ليه مع ان دي براها طامة ...... لكن ما عندك لي غيرا


          ...............................


قال ليها يا مغرورة .... تموتي ومكتوب عليك كم مرة زانية
قالت ليه أتحداك !!...  عُمري ما قعدت مع اجنبي ولا ثانية!!
قال ليها ما عارفة البتتعطر وتطلع تكون زانية وعلي نفسها جانية؟


                      ...........................


شمّ عِطرك  المُسِن  والشباب..... فتنتيهم...  وغويتي التايب
إنتِ سهمي البصطاد بيه كل زول....  كان شاب ولى شايب
أن جيتي طالعة أستناك في الباب وأستعرضك علي كل خايب


              ...................................


قالت ليه عليك اللعنة ... بس عندي فرصة بتنفعني الشهادة
قال ليها بتلقيها أتقل من الجبال لأنك ما كنتِ من اهل العِبادة
خلاص بعد كده اسيبك ..تمشي براك لي قبرك المضلم زيادة



            .......................................




قالت ليه ديل اهلي جايين........   أمش منّي ياغدار!!!!!!
قال ليها دي ملايكة العذاب ..... ومعاهم حنوط من النار
قالت ياربي رجعني للدنيا ....  أتوب من الكُبار وصُغار



       ..........................................



المسكينة صِحت من نومها مفزوعة وما صدقت نفسها حية!!
نزلت من سريرها وسجدت لي ربها تبكي وتسأله يجعلها تقية
ولقت راحتها في الصلاة.. وعِطِرها لما تجي طالعة موية نقية

الخميس، 27 ديسمبر 2012

بعض من الجنة


الجنة

الجنة أرضاً طيبة يدخلوها الطيبين
خلقَ الرحمن لي عِبادُو المُتقين
خياما من اللُؤلؤ والمسِك بدل الطين
فيها الخيرات الحِسان والحور العِين

...............


فيها العين سلسبيل والشراب زنجبيل
تلقى فيها أدم أبوك وأخوانك والخليل
الملايكة الكرام السفرة والروح جبريل
الرسول وأهله وأصحابُو النصروهُ قِبيل


...............


في الجنة القُصور والنعيم والخير
الفضة والحرير الشراب الطهور
الذهب والياقوت المسك والكافور


 .............


في الجنة لا شمس لا زمهرير
الأنهار بتجري والسوق الكبير
الفاكهة اللذيذة ولحوم الطير


...........


فيها الما شافتو عين ولا حِلم بيه بَشَر في حياتُو
آخر النعيم كشف الحجاب وشوفة العليم زاتُو 
الرضى والخلود في النعيم نِعمة من رحماتُو



أسأل الله لي ولكم رضاه فليس بعد رضاه إلا الجنة